چه آسمانا وراکئے اێر آیگ
16
سجّهێن اِسراییلی مهلوک چه اێلیما رهادگ بوت.
چه مِسرا در کپگا رند، دومی ماهئے پانزدَهُمی رۆچا سینئے گیابانا سر بوتنت.
سین، اێلیم و سینائے نیاما اِنت.
2 گیابانا، اِسراییلئے سجّهێن مهلوک موسّا و هارونئے سرا نُرُنڈگا لگّت.
3 اِسراییلیان گوَشت:
”دْرێگتا* ما مِسرا هُداوندئے دستا بمُرتێنێن.
اۆدا وَه ما گۆشتئے دێگانی کِرّا نِشتگاَتێن و دِلئے سێرا نانَ وارت.
بله شما مارا اے گیابانا آورت که اے سجّهێن مهلوکا چه شُدا بکُشێت.“
4 هُداوندا گۆن موسّایا گوَشت:
”بچار، من چه آسمانا په شما نگنَ گوارێنان.
مهلوک هر رۆچ ڈنّا در بیئیت و وتی هما رۆچئے کِساسا نگن مُچّ بکنت و بزوریت.
اے پئیما آیانَ چکّاسان که بارێن منی شَریَتئے راها رئونت یا نه.
5 وتی شَشُمی رۆچئے نگنان که کارنت و تئیارَ کننت، باید اِنت چه پێسری هر یکّ رۆچێئے نگنان دو سَری* ببنت.“
6 موسّا و هارونا گۆن سجّهێن اِسراییلیان گوَشت:
”مرۆچی بێگاها شما زانێت که چه مِسرا شمئے در کنۆک هُداوند اَت و
7 باندا سُهبا شما هُداوندئے شان و شئوکتا گندێت.
چێا که شما هُداوندئے سرا نُرُنڈِتَگ و آییا اِشکتگاَنت.
ما چے اێن که شما مئے سرا بنُرُنڈێت؟“
8 موسّایا گوَشت:
”هُداوند شمارا په ورگا بێگاها گۆشت و سُهبا نگنَ دنت، لاپئے سێرا، چێا که هُداوندا شمئے هما نُرُنڈگ اِشکتگاَنت که شما آییئے سرا کرتگاَنت.
ما چے اێن؟
شما مئے سرا نُرُنڈگا نهاێت، هُداوندئے سرا نُرُنڈگا اێت.“
9 موسّایا گۆن هارونا گوَشت:
”سجّهێن اِسراییلی مهلوکا بگوَش:
’هُداوندئے بارگاها بیاێت.
چێا که شمئے نُرُنڈگی اِشکتگاَنت.‘“
10 چۆ بوت که وهدے هارون گۆن سجّهێن اِسراییلی مهلوکا هبرا اَت، آیان گیابانئے نێمگا چارِت و هُداوندئے شان و شئوکتِش دیست که جمبرئے تها زاهر اَت.
11 هُداوندا گۆن موسّایا گوَشت:
12 ”من اِسراییلیانی نُرُنڈگ اِشکتگاَنت.
آیان بگوَش:
’بێگاها گۆشت و سُهبا نگنَ ورێت، لاپئے سێرا.
گڑا شما زانێت که من هُداوند آن، شمئے هُدا.‘“
13 چۆ بوت که بێگاها نِکۆلێن* مُرگ آتکنت و اُردگاهِش سرپۆش کرت و سُهبا نۆدئے لاے* سجّهێن اُردگاهئے چَپّ و چاگردا اێر نِشت.
14 وهدے نۆدئے لا گار بوت، زمینا نازُرکێن کُچَلئے* پئیمێن چیزّے دَرا بوت، برپئے پُژّکئے پئیمێن.
15 وهدے اِسراییلیان دیست، گۆن یکدگرا گوَشتِش:
”اے چێے؟“
چێا که آیان نزانت اے چێے.
موسّایا گوَشت:
”اے هما نگن اِنت که هُداوندا شمارا په ورگا داتگ.
16 هُداوندئے داتگێن هُکم اِش اِنت:
’همینچُک که ورێت، همینچُک بزورێت.
په وتی گِدانئے هر مردمێا یکّ اُمێرێئے* کِساسا بزورێت.‘“
17 اِسراییلیان نگن زرت، بله لهتێنا گێشتر زرت و لهتێنا کَمتر.
18 وهدے اُمێرئے هسابا کئیلِش کرتنت،* دیستِش که آ کَسا که گێش زرتگ، وراک په آییا گێشێن نهاَنت و آ کَسا که کَمّ زرتگ، په آییا کمّ نهاَنت.
هرکَسا وتی لاپئے کِساسا زرتگاَت.
19 موسّایا گۆن آیان گوَشت:
”کَسّ تان سُهبا چه اے وراکان هچّ اێر مکنت.“
20 بله لهتێنا موسّائے هبر گۆش نداشت.
آیان چه اے وراکان چیزّے تان سُهبا وتی کرّا اێر کرت، بله اے وراک کِرم کپت و بۆ کنگا لَگّتنت.
گڑا موسّا آیانی سرا زَهر گپت.
21 هر سُهب مردمان وتی لاپئے کِساسا زرت، رۆچ که ترُندَ بوت، پَشت کپتگێن کُچَل آپَ بوتنت.
22 هر شَشُمی رۆچا آیان دو سَری وراکَ زرت، بزان په هر مردمێا دو اُمێر.
مهلوکئے سجّهێن سرۆک موسّائے کرّا آتکنت و موسّااِش هال دات.
23 موسّایا گۆن آیان گوَشت:
”هُداوندا چۆ گوَشتگ:
’باندا شَبَّتئے* رۆچ اِنت، هُداوندئے گیشّێنتگێن پاکێن رۆچ اِنت، په آرام کنگا.
شمارا هرچے که پَچگی اِنت، مرۆچی بپَچێت و هرچے که لَهڑ دئیگی اِنت، مرۆچی لَهڑ دئیێت.
هرچے که سرَ کئیت، په بانداتیگێن رۆچا اێرِش کنێت.‘“
24 هما پئیما که موسّایا گوَشتگاَت، مردمان سر آتکگێن وراک په بانداتیگێن رۆچا اێرَ کرتنت.
اے وراکان نه بۆَ کرت و نه کِرمَ کپتنت.
25 موسّایا گوَشت:
”مرۆچی اِشان بوَرێت چێا که مرۆچیگێن رۆچ په هُداوندا شَبَّتے.
مرۆچی اے وراک زمینا اێر آرگَ نبیت.
26 شش رۆچا مُچّ کنێت و بزورێت، بله هپتمی رۆچا، بزان شَبَّتئے رۆچا هچّ نێست.“
27 هپتمی رۆچا لهتێن مردم در آتک که رئوێن و نگن مُچَّ کنێن، بله هچِّش ندیست.
28 هُداوندا گۆن موسّایا گوَشت:
”تان کَدێنا سرا تابَ دئیێت و منی هُکم و سر و سۆجانَ نزورێت؟
29 بچارێت، منِ هُداوندا شمارا شَبَّتئے رۆچ بَکشاتگ.
پمێشکا شَشمی رۆچا شمارا دو رۆچئے نگنا دئیان.
هپتمی رۆچا شما هر جاگها اێت، همۆدا ببێت.
هپتُمی رۆچا کَسّ چه وتی جاگها در مئیئیت.“
30 گڑا مهلوکا هپتمی رۆچا آرام کرت.
31 اِسراییلیان اے نگنئے نام ”مَنّ“* کرت.
اے گِهنیچئے* تُهمئے پئیمێن اَتنت، اِسپێتچَک اَتنت و تامِش چۆ بێنَگی نگنا اَت.
32 موسّایا گوَشت:
”هُداوندئے هُکم اِش اِنت:
’یَکّ پورهێن اُمێرے مَنّ په وتی آیۆکێن نَسل و پَدرێچان* اێر کنێت، که آ هما نگنا بگندنت که من گیابانا شمارا وارێنت، هما وهدا که من شمارا چه مِسرا در کرت و آورت.‘“
33 موسّایا گۆن هارونا گوَشت:
”دَرپے بزور و یکّ اُمێرے مَنّی مان کن و هُداوندئے بارگاها اێری کن که په شمئے آیۆکێن نَسل و پَدرێچان اێر ببیت.“
34 هما پئیما که هُداوندا موسّا هُکم داتگاَت، هارونا اے دَرپ شاهِدیئے وانِکانی* دێما اێر کرت که پَهازگ* ببیت.
35 اِسراییلیان تان چِلّ سالا منَّ وارت، بزان تان هما وهدا که آبادێن مُلکێا سر بوتنت.
تان هما وهدا که کَنهانئے سیمسرا رَستنت، مَنِّشَ وارت.
36 یکّ اُمێرے اێپهئے* دَهیَکّ اِنت.